धनगढी, १० माघ/सहरमा दिनदिनै बढ्दो महँगीका बीच २० रुपैयाँमा पेटभरी खाना पाउनु आज सपना जस्तै लाग्न सक्छ। तर धनगढी बसपार्क नजिकै, पटेलामा रहेको श्री ऋषिकेश पिठ धर्म संरक्षण समितिले त्यो सपनालाई करिब एक वर्षदेखि वास्तविकतामा बदल्दै आएको छ। बिहानको यात्रा, दिनभरीको मजदुरी वा साँझको थकान—जहाँ थाकेका अनुहारहरू भोकसँग संघर्ष गरिरहेका हुन्छन्, त्यहीँ २० रुपैयाँको एउटा सादा थालले उनीहरूलाई राहत दिन्छ। यहाँ खाना केवल पेट भर्ने साधन होइन, सम्मान र आत्मीयताको अनुभूति पनि हो। शनिबार धनगढी–५ हसनपुरस्थित सामुदायिक प्रहरी सेवा केन्द्रका पदाधिकारी तथा सदस्यहरू पनि यही थालको साक्षी बने।
सेवा केन्द्रका अध्यक्ष जनकराज पाण्डे र उपाध्यक्ष कुबेर बहादुर शाहीले २० रुपैयाँमा उपलब्ध खानाको स्वाद मात्र होइन, यसको भावनात्मक मूल्य झन् ठूलो रहेको बताउनुभयो। यो सेवाको सुरुवात गत वर्ष शिवरात्रीको अवसरमा श्री श्री १००८ महामण्डलेश्वर स्वामी राहुलेश्वरानन्द गिरीद्वारा गरिएको थियो। त्यसयता हरेक दिन, बिना भेदभाव, जो आउँछ उसैलाई खाना—यहीँको मूल मन्त्र बनेको छ। समितिका संयोजक पुष्करनाथ ओझाका अनुसार बिहान ९ बजेदेखि दिउँसो १ बजेसम्म र बेलुका ६ बजेदेखि ८ बजेसम्म खाना खुवाइन्छ। मजदुर, गरिब, यात्रु, विद्यार्थी—यहाँ सबै बराबर छन्। धनगढीमा यो केवल एउटा भोजनालय होइन, यो मानवताको पाठशाला हो—जहाँ २० रुपैयाँले पेट मात्र होइन, मन पनि भरिन्छ।
