धनगढी/नेपाल परिवार नियोजन संघ कैलाली शाखामा जापानिज इन्सेफलाइटिस (जेई) विरुद्धको खोप लगाउनेको संख्या साढे ४ सय नाघेको छ।
कैलालीमा सञ्चालन भइरहेको जापानिज इन्सेफलाइटिसविरुद्धको खोप अभियानअन्तर्गत धनगढीस्थित संघको कैलाली शाखामा सोमबार अपराह्नसम्म ४ सय ५० जनाभन्दा बढीले खोप लगाएका हुन्।
नेपाल परिवार नियोजन संघ कैलाली शाखामा असोज ८ गतेदेखि नियमित रूपमा जेईविरुद्धको खोप लगाउने व्यवस्था गरिएको छ। खोप लगाउन आउनेको चाप दैनिक रूपमा बढिरहेको शाखाले जनाएको छ।
संघका अध्यक्ष जनकराज जोशीका अनुसार शाखामा सञ्चालन भइरहेको खोप अभियान असोज २२ गतेसम्म निरन्तर सञ्चालन हुनेछ। अभियान अवधिभर तोकिएको समयभित्र केन्द्रमा पुगेर लक्षित व्यक्तिले खोप लगाउन सक्ने व्यवस्था गरिएको उनले बताए।
खोप अभियानमा संलग्न स्वास्थ्यकर्मीका अनुसार केन्द्रमा दैनिक एक सयभन्दा बढी व्यक्ति जापानिज इन्सेफलाइटिसविरुद्धको खोप लगाउन आउने गरेका छन्। पछिल्लो समय जेईविरुद्धको खोपप्रति नागरिकको चासो बढेसँगै खोप केन्द्रमा आउनेको संख्या पनि उल्लेख्य रहेको स्वास्थ्यकर्मीहरूले बताएका छन्।
जापानिज इन्सेफलाइटिस लामखुट्टेको टोकाइबाट सर्ने भाइरसजन्य रोग हो। विशेषगरी वर्षायाम र त्यसपछिको समयमा लामखुट्टेको प्रजनन तथा संक्रमणको जोखिम बढ्ने भएकाले यसको रोकथामका लागि खोपलाई महत्वपूर्ण मानिन्छ। संक्रमण भएमा ज्वरो आउने, टाउको दुख्ने, वाकवाकी हुनेदेखि गम्भीर अवस्थामा मस्तिष्कमा असर पुग्न सक्ने भएकाले समयमै खोप लगाउनु आवश्यक हुन्छ।
कैलालीमा सञ्चालन गरिएको अभियानले खोपबाट रोकथाम गर्न सकिने जापानिज इन्सेफलाइटिसको जोखिम न्यूनीकरणमा सहयोग पुग्ने अपेक्षा गरिएको छ।
