चितवन, २५ माघ/नवलपुरको गैंडाकोटमा विद्युत् लाइन मर्मतका लागि पोलमा चढेका एक मजदुरको करेन्ट लागेर मृत्यु भएको छ । मृत्यु हुनेमा जाजरकोटको भेरी नगरपालिका घर भएका ३३ वर्षीय आर्यनसिंह ठकुरीको रहेको जिल्ला प्रहरी कार्यालय नवलपुरका प्रहरी नायव उपरीक्षक जेशी शाहले जानकारी दिए ।
गैंडाकोट नगरपालिका वडा नम्बर ५ कालिकाचोकमा पुरानो पोलबाट नयाँ पोलमा बिजुलीको लाइन सार्ने क्रममा विहीबार बेलुका ६ः२० बजेतिर उनलाई करेन्ट लागेको हो । एक्कासि करेन्ट लागेपछि उनको पोलमै मृत्यु भएको थियो । पोलमा झुण्डिएको अवस्थाको शव प्रहरी समेतको सहयोगमा तल झारिएको थियो । स्थानीय एक व्यक्तिले नेपाल विद्युत प्राधिकरणले एक्कासि बिजुलीको लाइन छाडिदिँदा उनको करेन्ट लागेर मृत्यु भएको दाबी गरेका छन् । यद्यपि यसको पुष्टि हुन बाँकी छ । डिएसपी शाहले यसबारे विस्तृत विवरण थाहा नभएको र अनुसन्धान जारी रहेको बताए ।
