फोनिज सुदूरपश्चिमको तेश्रो महाधिवेशन सम्पन्न : मुख्यमन्त्री शाहले मादल बोजाएर गर्नुभयो महाधिवेशनको उद्घाटन, अध्यक्षमा उन्नती

धनगढी, १९ माघ/नेपाल आदिवासी जनजाति पत्रकार महासंघ (फोनिज) सुदूरपश्चिमको अध्यक्षमा कालीमैँया चौधरी (उन्नती) निर्विरोध निर्वाचित हुनुभएको छ । फोनिज प्रदेश कार्यसमितिको आज (शनिबार) धनगढीमा भएको तेस्रो महाधिवेशनले चौधरीको नेतृत्वमा सर्वसम्मतले नयाँ कार्यसमिति चयन गरेको हो ।
समितिको उपाध्यक्षमा बनवारी राना (सौरभ), महिला उपाध्यक्षमा चन्द्रिका चौधरी, महा–सचिवमा भानुप्रताप राना, सचिवमा हरेन्द्र चौधरी र रतनलाल चौधरी तथा कोषाध्यक्षमा प्रेमलाल चौधरी चयन हुनुभएको छ ।


सदस्यहरूमा स्वरुप चौधरी, राजेश श्रेष्ठ, रामप्रसाद चौधरी र दानसिंह डगौंरा चयन हुनु भएको छ । नवनिर्वाचित कार्यसमितिका पदाधिकारी र सदस्यहरूलाई फोनिज केन्द्रीय कार्यसमितिका वरिष्ठ उपाध्यक्ष लक्की चौधरीले पद् तथा गोपनियताको शपथ ग्रहण गराउनुभयो ।
यसअघि भएको उद्घाटन समारोहमा बोल्दै सुदूरपश्चिम प्रदेशका मुख्यमन्त्री कमलबहादुर शाहले मिडियामा आदिवासी जनजाति पत्रकारको उपस्थिति हुनु सकारात्मक पक्ष रहेको बताउनु भयो ।
फोनिज सुदूरपश्चिम प्रदेशको तेस्रो महाधिवेशनको धनगढीस्थित डायमन्डस् कटेजमा उद्घाटन गर्नु हुँदै मुख्यमन्त्री कमलबहादुर शाहले यस्तो बताउनु भएको हो । मुख्यमन्त्री शाहले आदिवासी जनजाति पत्रकार नेतृत्व तहमा समेत पुगिरहेको चर्चा गर्नुभयो ।
प्रदेश सरकारले चाँडै नै आमसञ्चार नीति ल्याउने उल्लेख गर्नुहुँदै उहाँले भन्नुभयो,“अहिले मन्त्रालयमा सचिव र उपसचिव नभएकाले यो अगाडि बढ्न सकेको छैन । तर, सञ्चार नीतिका लागि धेरै छलफल भइसकेको छ । अब पत्रकारहरूसँग अन्तिम पटक छलफल गरेर यसलाई चाँडै प्रदेश सभामा लैजान्छौं ।”
मुख्यमन्त्री शाहले पछिल्लो समय मिडिया सर्भाइभ हुन कठिन भइरहेको र समस्याका कारण सरकारमाथि अलि बढी निर्भर हुनु परेको बताउनुभयो । उहाँले प्रदेश सरकारले पत्रकारको विकासका लागि यो वर्ष पनि बजेट विनियोजन गरेको बताउँदै थप्नुभयो,“अनुदान र सहयोगका कार्यक्रमका लागि एकद्वार प्रणालीमार्फत आउन म पत्रकारको छाता सङ्गठनलाई आग्रह गर्दछु ।”
उहाँले थारू भाषामा पनि समाचार छाप्न आफूले राष्ट्रिय समाचार समितिलाई आग्रह गरेको बताउनुभयो । मुख्यमन्त्री शाहले सत्ता र सरकार नजिक भएकाले अनुदान, सहयोग लगायतका कार्यक्रम अलि बढी पाउने, पहुँच नभएकाले नपाउने जस्ता कार्यलाई निरुत्साहित गर्नु पर्ने बताउनुभयो । उहाँले बडघर, भलमनसा ऐन प्रदेश सरकारले चाँडै ल्याउने बताउनुभयो । यसैगरी, मुक्त कम्लहरी, हलियाको कार्यविधि पनि चाँडै बन्ने मुख्यमन्त्रीको भनाइ थियो ।
उहाँले थारू र रानाथारू समुदायको सहयोगमा प्रदेश सरकारले प्रदेश निजामति ऐनलाई संशोधन गरेर कार्यान्वयनमा लग्न सकेको उल्लेख गर्दै थारू र रानाथारूको कोटाप्रतिशत बढाउनका लागि संशोधन गर्ने सवालमा प्रदेश सरकारले छलफल गरिरहेको उल्लेख गर्नुभयो । “कुरा थारू र रानाथारूको कोटा प्रतिशत बढाउने भन्ने थियो । तर, कार्यदलले बुझाएको प्रतिवेदनमा मागै नउठाएको र जनसङ्ख्यासमेत नभएको अरू समुदायका कुरा पनि आयो”, मुख्यमन्त्री शाहलके भन्नुभयो,“थप कुरा आएपछि यसमा छलफल गर्नुपर्छ भनेर तत्काललाई रोकिएको छ । यसको मतलब मागलाई गुमराहमा राख्न खोजिएको होइन । छलफलपछि यो अगाडि बढ्छ ।”


कार्यक्रमका विशिष्ट अतिथी धनगढी उपमहानगरपालिकाका उपप्रमुख कन्दकला रानाले गरेका काम र विकासको कुरा देखाउनका लागि पत्रकारको भूमिका महत्त्वपूर्ण रहने गरेको बताउनुभयो । उहाँले कसैको पनि दबाबमा नपरेर कलम चलाउन आदिवासी जनजाति पत्रकारलाई आग्रह गर्नुभयो । उपप्रमुख रानाले आदिवासी जनजाति पत्रकारको वृत्तिविकासमा सहयोग पुग्ने गरी ऐन बनाउन प्रदेश सरकारलाई आग्रह गर्नुभयो ।
नेपाल आदिवासी जनजाति पत्रकार महासङ्घका वरिष्ठ उपाध्यक्ष लक्की चौधरीले फोनिजले आदिवासी जनजाति पत्रकारको श्रीवृद्धि, क्षमता वृद्धि, आदिवासी रीतिरिवाज र संस्कृति संरक्षणको क्षेत्रमा काम गर्दै आएको बताउनुभयो । यसैगरी, नेपाल पत्रकार महासङ्घको संस्थापक अध्यक्ष सत्यनारायण श्रेष्ठ रहनु भएको विभिन्न तथ्यतथ्याङ्कले पुष्टि गरेकाले त्यसका लागि पनि फोनिजले वकालत गर्दै आएको चौधरीको भनाइ थियो ।


कपी पेस्ट पत्रकारिता फस्टाइरहेको वर्तमान सन्दर्भमा मातृभाषा पत्रकारितालाई प्राथमिकता दिन प्रदेश सरकारलाई आग्रह गर्नुहुँदै भन्नुभयो, ‘पत्रकारको क्षमता अभिवृद्धिका लागि अनुदान दिन, विभिन्न योजना, कार्यक्रम अगाडि बढाउन म प्रदेश सरकारलाई आग्रह गर्दछु ।’
२०५६ सालमा आदिवासी जनजाति पत्रकार संघको रूपमा स्थापना भएको फोनिजमा आठ वटा जातिय सङ्गठनका पाँच हजार पत्रकार गोलबद्ध रहेको वरिष्ठ उपाध्यक्ष चौधरीले जानकारी दिनुभयो । उहाँले ६२ जिल्लामा फोनिजको सङ्गठन विस्तार भएको उल्लेख गर्नुभयो ।
नेपाल आदिवासी जनजाति पत्रकार महासंघका सुदूरपश्चिम प्रदेश इन्चार्ज भिमबहादुर चौधरीले स्वागत गरेको कार्यक्रममा नेपाल पत्रकार महासङ्घ सुदूरपश्चिम प्रदेशका अध्यक्ष भरत शाह, नेपाल आदिवासी जनजाति समन्वय परिषद् सुदूरपश्चिमका अध्यक्ष दलबहादुर घर्ती, बातचित घरका अध्यक्ष माधव थारू, थारू कल्याणकारिणी सभा कञ्चनपुरको अध्यक्ष सानु चौधरी, प्रेस सेन्टरका प्रदेश महासचिव करन चन्द लगायतले शुभकामना मन्तव्य राख्नु भएको थियो । कार्यक्रम फोनिज सुदूरपश्चिम प्रदेशका अध्यक्ष रामलखन चौधरीको अध्यक्षतामा भएको थियो ।

 

तपाईको प्रतिक्रिया